યુએસ ઓપનમાં ચેમ્પિયન થવા બદલ ૧૦ કરોડ ૮૧ લાખ મળ્યા

ન્યૂ યોર્ક, તા.૧૪  નંબર વન ક્રમાંકિત સર્બિયાના નોવાક યોકોવિચે યુએસ ઓપનમાં ચેમ્પિયન બનવાની સાથે જ આ વર્ષે ત્રીજું ગ્રાન્ડસ્લેમ મેળવ્યું હતું. ચેમ્પિયન બનવાની સાથે જ યોકોવિચે આ વર્ષની ઇનામી રકમનને વિક્રમી સ્તરે પહોંચાડી દીધી છે. યોકોવિચે ૨૦૧૧માં ૬૬ મેચમાંથી ૬૪માં જીત મેળવીને આ વર્ષે પોતાની ઇનામી રકમને ૧ કરોડ ૬ લાખ ડોલર (૫૦ કરોડ ૪૩ લાખ રૂપિયા)ના રેકોર્ડ સ્તરે પહોંચાડી હતી. જે એટીપી વર્લ્ડ ટૂરની મની લિસ્ટમાં એક રેકોર્ડ છે. યુએસ ઓપનની ફાઈનલમાં નાદાલે હરાવીને યુએસ ઓપનમાં ચેમ્પિયન બનેલા યોકોવિચને ૨૩ લાખ ડોલર મળ્યા હતા. જેમાં ૧૮ લાખ ડોલરની ઇનામી રકમ અને ૫ લાખ ડોલર યુએસ ઓપન સિરીઝ સ્ટેન્ડિંગમાં ટોપ પર રહેવા બદલ મળ્યા હતા. આ પહેલાં ૨૦૧૦માં સ્પેનના રાફેલ નાદાલ અને ચાર વર્ષ પહેલાં સ્વિત્ઝરલેન્ડનો રોજર ફેડરર આ રકમ સુધી પહોંચ્યા હતા. આ બન્ને ખેલાડીઓએ લગભગ ૧ કરોડ બે લાખ ડોલરની કમાણી કરી હતી. ટેનિસ ખેલાડીઓની કમાણી ખેલાડી કમાણી રોજર ફેડરર ૨,૮૬,૧૭,૫૫,૧૧૦ રૂપિયા પીટ સામ્પ્રસ ૨,૦૩,૪૧,૮૨,૯૮૩  રૂપિયા                  રાફેલ નાદાલ ૨,૦૦,૫૨,૬૬,૮૪૪ રૂપિયા આન્દ્રે અગાશી ૧,૪૬,૬૧,૮૯,૮૨૫ રૂપિયા નોવાક યોકોવિચ ૧,૩૩,૧૩,૪૪,૩૨૫ રૂપિયા   યોકોવિચ ચેમ્પિયન

ન્યૂયોર્ક, તા. ૧૩ સર્બિયાના સુપરસ્ટાર પ્લેયર નોવાક યોકોવિચે આ સિઝનમાં પોતાની 'ગોલ્ડન રન' જારી રાખતાં બીજા ક્રમાંકિત રફેલ નાદાલને હરાવી યુએસ ઓપન ગ્રાન્ડસ્લેમમાં મેન્સ સિંગલ્સનું ટાઇટલ જીતી લીધું છે. રફેલ નાદાલ સામેનો આ મુકાબલો જીતવા યોકોવિચને ખાસ સમસ્યા નડી નહોતી અને તેણે ૬-૨, ૬-૪, ૬-૭ (૩-૭), ૬-૧થી વિજય મેળવી કારકિર્દીનું પ્રથમ યુએસ ઓપન ટાઇટલ પોતાને નામે કર્યું હતું. યોકોવિચ આ વર્ષે ફ્રેન્ચ ઓપન સિવાય ત્રણેય ગ્રાન્ડસ્લેમ ઉપર કબ્જો જમાવી ચૂક્યો છે, આ ઉપરથી જ તેના શાનદાર ફોર્મનો અંદાજ આવી શકે છે. યોકોવિચનો આ વર્ષે ૬૬માંથી ૬૪ મેચમાં વિજય થયો છે. રફેલ નાદાલ અને યોકોવિચની ટક્કર રોમાંચક બની રહેશે તેવી અપેક્ષા રખાતી હતી. પરંતુ નાદાલને હાવી થવા દીધો નહોતો અને ૪ કલાક ૧૦ મિનીટમાં ચેમ્પિયનશિપ પોતાને નામે કરી હતી. નાદાલ માટે આ સિઝન અપેક્ષા કરતાં સાધારણ રહી છે. જેમાં તેને યોકોવિચ સામે નંબર-વનનો તાજ ગુમાવવો પડયો છે. આ ઉપરાંત નાદાલે  વિમ્બલ્ડન, યુએસ ઓપન એમ બે વાર ગ્રાન્ડસ્લેમની ફાઇનલમાં યોકોવિચ સામે જ પરાજયનો સ્વાદ ચાખ્યો છે. આ વર્ષે નાદાલ સામેની છ મેચમાં યોકોવિચે જ વિજય મેળવ્યો છે. વિજય બાદ યોકોવિચે જણાવ્યું હતું કે મેં આ સિઝન માટે ખૂબ જ મહેનત કરી હતી, જે ફળી છે. ફ્રેન્ચ ઓપનની સેમિફાઇનલમાં પરાજય થતાં કેરિયર સ્લેમ નહીં પૂરી શકવાનો અફસોસ છે. જોકે, આગામી સિઝનમાં ફ્રેન્ચ ઓપન જીતી કેરિયર સ્લેમ પૂરી કરવા કોઇ જ કસર બાકી નહીં રાખું. બીજી તરફ નાદાલે જણાવ્યું હતું કે આ વર્ષે યોકોવિચ સામે છ એ છ મેચમાં હારી જવાનો મને ખૂબ જ અફસોસ છે. હું મારી નબળાઇ ઉપર મહેનત કરી આગામી સિઝનમાં વાપસી કરવા કોઇ જ કસર બાકી નહીં રાખું. યોકોવિચ સામે યુએસ ઓપનની ફાઇનલમાં મારી સર્વિસ ખૂબ જ સાધારણ હતી. યોકોવિચ : ધ ન્યૂ સુપરસ્ટાર: ર્સિબયાના નોવાક યોકોવિચનું ચોથું અને વર્ષનું ત્રીજું ગ્રાન્ડસ્લેમ ટાઇટલ છે. યોકોવિચે ૨૦૦૮-૨૦૧૧માં ઓસ્ટ્રેલિયન ઓપન, ૨૦૧૧માં જ વિમ્બલ્ડન અને યુએસ ઓપનનું ટાઇટલ જીત્યું છે. : યોકોવિચને કેરિયર ગ્રાન્ડસ્લેમ માટે હવે માત્ર ફ્રેન્ચ ઓપન જીતવાની જરૃર છે. : આ સિઝનમાં યોકોવિચનો ૬૬માંથી ૬૪ મેચમાં વિજય અને બે મેચમાં પરાજય થયો છે. આમ, તેની વિજયની સરેરાશ ૯૬.૯૭ની છે. હજુ સુધી કોઇ પણ પ્લેયરની સિઝનમાં આ વિજયની શ્રેષ્ઠ સરેરાશ છે. : એક જ સિઝનમાં સૌથી વધુ ૧૦૬ મેચ જીતવાનો રેકોર્ડ ઇવાન લેન્ડલને નામે છે. લેન્ડલે ૧૯૮૨માં ૧૧૫માંથી માત્ર ૯ મેચ ગુમાવી હતી. : યોકોવિચે માત્ર ૧૮ સપ્તાહમાં વર્લ્ડ ટૂર ફાઇનલ્સ માટે ક્વોલિફાઇ કર્યું હતું, જે એક રેકોર્ડ છે. : યોકોવિચ આ સિઝનમાં સતત ૪૩ મેચ જીત્યો હતો અને તે હજુ સુધી પાંચ એટીપી ટાઇટલ જીતી ચૂક્યો છે. કોણ શેમાં ચેમ્પિયન? મેન્સ સિંગલ્સ નોવાક યોકોવિચ વિમેન્સ સિંગલ્સ સામન્તા સ્ટોસર મેન્સ ડબલ્સ મેલ્ઝર-પેટ્ઝચેનર વિમેન્સ ડબલ્સ હ્યુબર-રેમન્ડ મિક્સ ડબલ્સ ઓડિન-સોક